Ante a falta de transparencia e o teatrillo da Alcaldesa en Santiago.

(Foto cedida por El Boletín desde Narón)

Na comisión de obras deste luns 16 de xullo, ante as preguntas do Concelleiro de Eliximos sobre as conversacións mantidas pola alcaldesa e o concelleiro de urbanismo coa Dirección da Axencia Galega de Infraestruturas (en diante AXI), o Sr. Ramos comunicou que se entregou unha recompilación de queixas dos veciños e obtiveran o compromiso por parte da dirección da AXI de contactar directamente cos veciños, sen intermediarios, para tratar de chegar a un acordo un a un para resolver os problemas que estes expuñan.

Queren obviar, tanto o Concello como a AXI, as solicitudes xa feitas por rexistro coas firmas de moitos dos afectados para tratar de desfacer as demandas colectivas, seguindo a máxima de “divide e vencerás”.

Ao solicitar copia da documentación que se entregou á AXI negouse a mesma argumentando que era documentación que se recolleu a nivel persoal, a pesar que confirmou que a reunión era de carácter oficial entre administracións.

A lei de Administracións públicas obriga a que a transmisión da información oficial entre administracións realícese por rexistro mediante documento público. As conversacións ou comentarios realizados de viva voz e non recollidos nun acta tamén carecen de validez legal. Por tanto, NON houbo entrega de documentación válida.

Por outra banda, nas visitas realizadas polos concelleiros a algúns dos afectados da zona foron tomando notas que non ensinaron aos mesmos nin estes rubricaron, tampouco se lles informou de que as informacións recollidas íanselle a trasladar á AXI ou outros organismos públicos. Por tanto, carecen de toda validez como demanda NON recoñecida polos afectados.

Estamos novamente ante unha posta en escena carente de toda transparencia e validez legal, un teatrillo entre administracións co fin de enganar á opinión pública sobre a realidade das súas intencións. Unha mostra máis de falta de calidade democrática do Goberno de Narón.

Deixa unha resposta